KUMANOVË, 7 TETOR 2025 – Një ngjarje e rëndë ka tronditur mbrëmjen e së martës qytetin e Kumanovës në Maqedoninë e Veriut, ku kandidati i Bashkimit Demokratik për Integrim (BDI), Zekirja Shahini, ka mbetur i plagosur pas një atentati të armatosur.

Sipas njoftimeve zyrtare nga BDI dhe mediave vendase, Shahini, 43 vjeç, banor i fshatit Sllupçan dhe bartës i listës së këshilltarëve të partisë në komunën e Likovës, është qëlluar me tre plumba në këmbë nga një person i maskuar që i kishte zënë pritë. Ai është dërguar menjëherë në spitalin e Kumanovës, ku ndodhet jashtë rrezikut për jetën.

Dëshmitarët në vendngjarje kanë treguar se agresori, pasi hapi zjarr, u largua me shpejtësi në drejtim të panjohur. Forcat policore dhe grupi hetimor kanë rrethuar zonën dhe po punojnë për zbardhjen e plotë të rrethanave të atentatit, si dhe për identifikimin e autorëve.

Në reagimin e saj zyrtar, BDI e ka dënuar ashpër sulmin, duke e cilësuar si një akt të rëndë dhune dhe duke kërkuar reagim të menjëhershëm nga Ministria e Punëve të Brendshme dhe Prokuroria Publike.

“Jemi të shqetësuar nga sulmi i armatosur ndaj kandidatit tonë dhe bartësit të listës në komunën e Likovës, i cili u qëllua nga persona me maska dhe u plagos. Fatmirësisht, jeta e tij është jashtë rrezikut… Kërkojmë nga institucionet që të veprojnë me transparencë të plotë për të zbardhur rastin dhe për të garantuar sigurinë e qytetarëve,” – thuhet ndër të tjera në reagimin e partisë.

Në shenjë solidariteti me të plagosurin, BDI ka pezulluar të gjitha aktivitetet e saj për ditën e sotme, duke u bërë thirrje qytetarëve dhe mbështetësve të ruajnë qetësinë dhe të mos bien pre e provokimeve.

Autoritetet e rendit vijojnë hetimet për të zbuluar motivet dhe përgjegjësit e atentatit që ka tronditur opinionin publik në Kumanovë.