Confindustria Albania dhe Dhoma e Tregtisë Italiane në Shqipëri reagojnë pas vrasjes së sipërmarrësit italian Edoardo Sarchi

Confindustria Albania dhe Dhoma e Tregtisë Italiane në Shqipëri kanë shprehur tronditje dhe shqetësim të thellë pas ngjarjes së rëndë ku humbi jetën sipërmarrësi italian Edoardo Sarchi, i cili u vra tragjikisht pranë Tepelenës.

Në një deklaratë zyrtare, dy organizatat shprehën ngushëllimet më të sinqerta dhe solidaritetin e tyre për familjen e viktimës, duke theksuar se ngjarje të tilla nuk mund të mbeten të pandëshkuara dhe kërkojnë reagim të menjëhershëm nga autoritetet shqiptare.

Kërkesa kryesore të organizatave

Nisja urgjente e një hetimi të plotë, transparent dhe të shpejtë, për zbardhjen e plotë të rrethanave.

Identifikimi i autorëve dhe garantimi i drejtësisë pa asnjë vonesë.

Mobilizimi i të gjitha burimeve hetimore, përfshirë bashkëpunimin me institucionet italiane.

Informimi i rregullt i opinionit publik mbi ecurinë e hetimeve.

Mbrojtje për çdo person që mund të ndihmojë në zbardhjen e çështjes.

Siguria e investitorëve në qendër të vëmendjes

Sipas deklaratës, siguria dhe besimi janë elementë thelbësorë për praninë dhe veprimtarinë e sipërmarrësve italianë në Shqipëri. Dy organizatat theksuan se do të vijojnë angazhimin për të garantuar kushte të plota ligjshmërie dhe sigurie për qytetarët dhe komunitetet sipërmarrëse italiane e shqiptare. /noa.al