Tiranë – Operacioni “Nënshkrimi”: Sekuestrohen pasuri me vlerë 3 milionë euro të një notereje

Policia e Tiranës ka finalizuar operacionin e koduar “Nënshkrimi”, duke sekuestruar pasuri me vlerë rreth 3 milionë euro, të dyshuara me burim kriminal.

Sipas njoftimit zyrtar, nën shënjestër ka qenë noterja 35-vjeçare Sanja Telhallari, e cila dyshohet se i ka përfituar këto asete gjatë ushtrimit të detyrës.

Çfarë u sekuestrua:

13 pasuri të paluajtshme

5 llogari bankare

Vendimi për sekuestrimin është ekzekutuar nga Gjykata e Tiranës, ndërsa hetimet po vijojnë për gjurmimin e pasurive të tjera të mundshme, si dhe për të dokumentuar me prova ligjore burimin e të ardhurave të saj.

Operacioni është zhvilluar nga Seksioni për Hetimin e Pastrimit të Parave dhe Aseteve Kriminale, në bashkëpunim me Prokurorinë e Tiranës.

Hetimet vijojnë, ndërsa materialet procedurale i janë referuar Prokurorisë për veprime të mëtejshme. /noa.al