Klevis Lleshi ishte vetëm 24 vjeç kur në gusht 2020 i morën jetën. Atë e rrëmbyen, e vranë dhe më pas e varrosën dhe u zhdukën në drejtim të paditur.

Kaluan më shumë se dy vite derisa trupi i të ndjerit u gjet. Kaluan dhe 3 vite të tjera derisa ngjarja deri diku të zbardhet.

Prokuroria e Posaçme thotë se e ka zbardhur vrasjen e 24 vjeçarit Klevis Lleshi, i cili u gjet i pajetë i groposur në fshatin Shpërdhet të Mamurrasit.

Raportohet se SPAK ka firmosur 4 urdhër-arreste për persona që dyshohet të jenë përfshirë në ngjarjen e rëndë kriminale.

Aktualisht rezulton i arrestuar orët e fundit, një prej 4 të dyshuarve.

Hetimet sugjerojnë se Aurel Hoxha, pronar i lokal Monopol, dyshohet si urdhërues i rrëmbimit dhe vrasjes së Klevis Lleshit. Më herët më 2012, ishte vrarë vëllai i Aurelit, Agim Hoxha.

Si nisi krimi makabër.

Më 5 gusht 2020 familja u shqetësua për faktin se nuk po kontaktonte dot me djalin e tyre Klevisin. Ata kërkuan ndihmën e policisë që u angazhua në kërkime për gjetjen e tij.

E ëma e Klevisit vuri gishtin në hasmërinë e përgjakshme që kishte me familjen Hoxha, hasmëri që dyshohet se ka marrë tashmë 4 jetë njerëzish, ndërkohë që vazhdon të jetë edhe një i zhdukur që në 2017 dhe gjithashtu me një person të dënuar.

Historia duket se nisi në Londër, duke precipituar në Burrel, atje ku u vranë dy vëllezër dhe u zhdukën dy djemtë e tyre.

Në dhjetor 2020 në fshatin Shpërdhet u bë me dije se disa mbetje kockore të një njeriu kishin dalë në sipërfaqe. Atëherë u njoftua se eshtrat u dërguan për identifikimin dhe vetëm më 6 shkurt 2023 u tha se i përkasin Klevis Lleshit, pasi ADN-ja kishte përkuar me adn e familjes së tij.

Saga e vrasjeve në familjen Lleshi kishte nisur dhjetë vite më herët. I ati i Klevisit, Xhavit Lleshi u vra në 2013 në.një pritë në vendin e quajtur “Pujkë”. Pak vite më vonë u vra dhe xhaxhai Hajredin Lleshi, pranë shtëpisë në Burrel.