Bulqizë, 25 Shtator 2025 – Pas aksidentit tragjik të ndodhur një ditë më parë në një subjekt minerar në zonën D të Bulqizës, ku humbi jetën punëtori Kujtim Dangri, 38 vjeç, Policia ka ndërmarrë masa ligjore ndaj tre punonjësve të stafit teknik të subjektit.

Në vijim të hetimeve për zbardhjen e rrethanave të ngjarjes, e cila dyshohet se ndodhi si pasojë e shembjes së një masivi shkëmbor në galeri, Policia e Bulqizës ka vënë në pranga:

G. K., 47 vjeç, me detyrë brigadier;

B. C., 62 vjeç, me detyrë teknik; të dy banues në Bulqizë.

Ndërkohë, është proceduar penalisht në gjendje të lirë edhe R. P., 67 vjeç, banues në Peshkopi, me detyrë drejtues teknik i subjektit minerar.

Sipas hetimeve paraprake, këta shtetas dyshohet se nuk kanë marrë masat e nevojshme për garantimin e kushteve teknike dhe të sigurisë në punë, duke sjellë si pasojë humbjen e jetës së një punonjësi.

Ngjarja ka ngritur shqetësime lidhur me zbatimin e rregullave të sigurisë në subjektet minerare, ku incidentet me pasoja fatale janë raportuar në mënyrë të përsëritur ndër vite.

Materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprën penale "Shkelja e rregullave të mbrojtjes në punë", me pasojë vdekjen.

Hetimet për këtë ngjarje vijojnë.