Durrës – Apartament me qira i kthyer në bazë prostitucioni, tre shtetase kineze në pranga

Një apartament i marrë me qira në lagjen nr. 13, Plazh, Durrës, ishte përshtatur për ushtrimin e prostitucionit nga tre shtetase kineze.

Pas tre javësh hetime me metoda proaktive, Policia e Durrësit, në bashkëpunim me Forcën e Posaçme Operacionale dhe nën drejtimin e Prokurorisë, finalizoi operacionin e koduar “Space”, duke vënë në pranga organizatoret dhe duke proceduar penalisht klientët e përfshirë.

Të arrestuarat

Në kuadër të operacionit u arrestuan në flagrancë:

M. Y., 41 vjeçe

J. B., 43 vjeçe

L. H., 47 vjeçe

Ato akuzohen për veprat penale “Prostitucioni” dhe “Përshtatja e ambienteve për prostitucion”.

Klientët e proceduar

Prokuroria nisi procedimin penal në gjendje të lirë për pesë shtetas shqiptarë:

A. Gj., O. Ll., V. N., A. K. dhe A. G., të cilët akuzohen për përfshirje në prostitucion.

Provat e sekuestruara

Gjatë kontrollit në apartamentin e përshtatur për prostitucion, policia gjeti dhe sekuestroi:

3 pasaportat e shtetaseve kineze,

një shumë parash të dyshuar të përfituar nga prostitucioni,

8 celularë,

11 karta bankare të lëshuara nga banka të Kinës dhe Emirateve të Bashkuara Arabe.

Vijimi i procedurës

Materialet u referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore. /noa.al