Vladimir Putin tha se është gati të takohet me Zelenskyn, por shtoi se ky takim nuk do të çonte askund. Ndërsa theksoi: “I thashë të njëjtën gjë edhe Trumpit. Megjithatë do të isha i lumtur ta mirëprisja

Në Pekin, gjatë një konference shtypi përmbyllëse të vizitës së tij, Presidenti rus Vladimir Putin tha se është i gatshëm të takohet me Presidentin ukrainas, Volodymyr Zelenski.

Putin tha se shprehet i gatshëm vetëm nëse Zelenski udhëton drejt Moskës dhe nëse takimi është i mirëorganizuar dhe me rezultate të prekshme.

Kjo deklaratë vjen ndërsa Shtetet e Bashkuara, nën udhëheqjen e Donald Trump-it, po përpiqen t’i japin shtytje rrugës diplomatike për të zgjidhur konfliktin që vazhdon përtej tre vjetësh.

Çfarë tha Putini në Kinë

Presidenti rus Vladimir Putin e bëri deklaratën të mërkurën gjatë një konference shtypi në Pekin.

Ai tha se është i gatshëm të zhvillojë një takim me Presidentin ukrainas Volodymyr Zelenskiy—me kusht që ky i fundit të udhëtojë në Moskë.

“Sa i përket një takimi me Zelensky-n, unë kurrë nuk e kam përjashtuar mundësinë e një takimi të tillë. Por a ka kuptim? Le të shohim”, tha Putin. “Ia thashë edhe Trump-it këtë. Do të isha i lumtur ta mirëprisja në Moskë”, tha ai.

Ai shtoi se mbetet për t’u parë nëse një takim i tillë ka kuptim real dhe rezultat konkret, teksa theksoi se realizimi i një takimi të tilla duhet të jetë i përgatitur mirë dhe me objektiva të qarta.

Putin përmendi gjithashtu disa kushte që do të duhej të plotësoheshin për të avancuar në drejtim të dialogut, duke përmendur heqjen e ligjit ushtarak në Ukrainë, organizimin e zgjedhjeve dhe zhvillimin e një referendum për çështjet territoriale—duke lënë të kuptohet se kërkon progrese konkrete përpara një takimi mes udhëheqësve. /noa.al