Një aksident i rëndë rrugor është shënuar mesditën e sotme në aksin Shkodër–Lezhë, pranë kryqëzimit të Kryebushatit, ku janë përfshirë një kamion dhe dy automjete.

Sipas njoftimit zyrtar të Drejtorisë Vendore të Policisë Shkodër, rreth orës 12:10, kamioni me drejtues shtetasin H. Sh. është përplasur fillimisht me automjetin që drejtohej nga shtetasi A. L., e më pas edhe me një automjet tjetër me drejtuese shtetasen A. H.

Si pasojë e përplasjes së fortë, ka humbur jetën shtetasi A. L., 47 vjeç, i cili fillimisht ishte i paidentifikuar.

Gjithashtu, janë dëmtuar tre pasagjerë, konkretisht bashkëshortja e viktimës dhe dy fëmijët e tyre të mitur, të cilët janë transportuar me urgjencë në Spitalin Rajonal të Shkodrës, ku ndodhen nën kujdesin e mjekëve dhe janë jashtë rrezikut për jetën.

Në vendngjarje mbërritën shërbimet e ambulancës dhe të Policisë Rrugore, ndërsa grupi hetimor po vijon punën për zbardhjen e plotë të rrethanave të aksidentit dhe përcaktimin e përgjegjësive ligjore.