Izraeli përballet me dënime të shtuara për zgjerimin ushtarak në Gaza

DEIR AL-BALAH, Rripi i Gazës (AP) — Dënimet ndërkombëtare u shtuan të shtunën ndaj vendimit të Izraelit për marrjen nën kontroll ushtarak të qytetit të Gazës, ndërsa dhjetëra mijëra izraelitë protestuan në atë që mediat vendase e quajtën një nga protestat më të mëdha antiqeveritare të muajve të fundit, pas 22 muajsh lufte.

Përpjekjet për armëpushim dukeshin se po ringjalleshin pas njoftimit të Izraelit. I dërguari i posaçëm i SHBA-së, Steve Witkoff, pritej të takohej të shtunën në Spanjë me kryeministrin e Katarit për të diskutuar një propozim të ri për t’i dhënë fund luftës, sipas dy zyrtarëve të njohur me bisedimet, të cilët folën në kushte anonimiteti pasi nuk ishin të autorizuar të flisnin për mediat.

Ndërmjetësit Egjipti dhe Katari po përgatisin një kornizë të re armëpushimi që do të përfshinte lirimin e të gjithë pengjeve — të gjallë dhe të vdekur — në të njëjtën kohë, në këmbim të përfundimit të luftës dhe tërheqjes së forcave izraelite, thanë dy zyrtarë arabë për Associated Press.

Zyrtarët e shëndetësisë thanë se 20 palestinezë që po kërkonin ndihmë u vranë me armë të shtunën dhe 11 të rritur vdiqën nga shkaqe të lidhura me kequshqyerjen në 24 orët e fundit, ndërsa kritikat ndaj Izraelit u shoqëruan me thirrje për të lejuar më shumë ushqim të hyjë në enklavën e rrethuar.

—

“Mbylleni vendin”

Familjarët e pengjeve ushtruan presion mbi qeverinë e kryeministrit Benjamin Netanyahu mes frikës së re për 50 pengjet e mbetura, nga të cilët mendohet se 20 janë gjallë dhe në gjendje të rëndë.

Einav Zangauker, nëna e Matanit, i mbajtur peng në Gaza, u bëri thirrje izraelitëve, përfshirë sindikatën e fuqishme Histadrut, që “të na ndihmojnë të shpëtojmë pengjet, ushtarët dhe shtetin e Izraelit”, duke lënë të kuptohet për një grevë të përgjithshme: “Mbylleni vendin.”

Një deklaratë e përbashkët e nëntë vendeve, përfshirë Gjermaninë, Britaninë, Francën dhe Kanadanë, tha se ato “kundërshtojnë fuqishëm” vendimin e Izraelit për një operacion ushtarak në shkallë të gjerë, duke paralajmëruar se do të përkeqësojë “situatën humanitare katastrofike”, do të rrezikojë pengjet dhe do të shtojë rrezikun e zhvendosjes masive. Ata theksuan se çdo përpjekje për aneksim ose vendbanime në Gaza shkel ligjin ndërkombëtar.

Një deklaratë tjetër nga mbi 20 vende, përfshirë ndërmjetësit Egjiptin dhe Katarin, si dhe Arabinë Saudite, Turqinë dhe Emiratet e Bashkuara Arabe, e quajti vendimin e Izraelit një “përshkallëzim të rrezikshëm dhe të papranueshëm.” Ndërkohë, Rusia tha se plani i Izraelit do të përkeqësojë “situatën tashmë jashtëzakonisht dramatike” në Gaza.

Këshilli i Sigurimit i OKB-së planifikoi një takim urgjent të dielën.

—

Vrasje gjatë kërkimit të ndihmës

Zyrtarët e spitaleve Nasser dhe Awda thanë se forcat izraelite vranë të paktën 11 persona që po kërkonin ndihmë në jug dhe qendër të Gazës. Disa po prisnin pranë kamionëve të ndihmës, ndërsa të tjerë iu afruan pikave të shpërndarjes.

Ushtria izraelite mohoi hapjen e zjarrit dhe tha se nuk ishte në dijeni për incidentet. Ajo siguron rrugët që çojnë drejt pikave të shpërndarjes të drejtuara nga Fondacioni Humanitar i Gazës, i mbështetur nga Izraeli dhe SHBA, i cili nuk iu përgjigj menjëherë kërkesave për koment.

Dy dëshmitarë i thanë AP-së se trupat izraelite hapën zjarr ndaj turmave që po ecnin në këmbë drejt një pike shpërndarjeje të GHF në korridorin Netzarim, një zonë ushtarake që ndan në dysh Gazën. Njëri prej tyre, Ramadan Gaber, tha se snajperë dhe tanke qëlluan ndaj kërkuesve të ndihmës, duke i detyruar të tërhiqeshin.

Në veri, zjarri izraelit vrau të paktën nëntë persona dhe plagosi mbi 200 të tjerë ndërsa prisnin ndihma që hynin në Gaza përmes pikës kufitare Zikim, tha Fares Awad, kreu i shërbimit të ambulancës dhe emergjencës në zonë. Nuk pati reagim të menjëhershëm nga Izraeli.

Në Deir al-Balah, qindra njerëz vrapuan për të marrë atë që mundnin nga ndihmat e fundit të hedhura nga ajri. Organizatat humanitare i kanë cilësuar airdrop-et si të shtrenjta, të pamjaftueshme dhe potencialisht të rrezikshme për njerëzit në tokë.

Ushtria izraelite tha se të paktën 106 pako ndihmash u hodhën nga ajri të shtunën, ndërsa Italia dhe Greqia iu bashkuan për herë të parë operacionit. Pamjet nga Ministria e Mbrojtjes së Italisë tregonin pakot duke u hedhur me parashutë mbi peizazhin e thatë e të shkatërruar të Gazës.

Fëmijë zbathur mblidhnin oriz, makarona dhe thjerrëza që kishin rënë nga pakot në tokë.

“Kjo mënyrë nuk është për njerëz, është për kafshë,” tha Mahmoud Hawila, i cili tregoi se ishte goditur me thikë ndërsa përpiqej të siguronte një pako të hedhur nga ajri.

Izraeli pretendon, pa ofruar prova, se Hamasi devijon sistematikisht ndihmën nga sistemi ekzistues i udhëhequr nga OKB-ja, e cila e mohon këtë. Ky sistem ka kërkuar që më shumë kamionë që presin jashtë Gazës të lejohen jo vetëm të hyjnë në territor, por edhe të shkojnë në mënyrë të sigurt deri në destinacionet e shpërndarjes.

Me temperaturat mbi 32°C në Gaza, familjet po freskoheshin me copa kartoni ose tabaka metalike dhe flinin në tokë jashtë çadrave të tyre, ndërsa disa gra mblidhnin ujë herët në agim.

“Fëmijët e mi qajnë ditë e natë. Djali im kruan trupin nga vapa,” tha Nida Abu Hamad, e zhvendosur që strehohet me familjen në qytetin e Gazës. /noa.al