Tiranë – Arrestohet në Allias 28-vjeçari nga Shkodra i dyshuar për tregti armësh; i lidhur me grup kriminal

Një operacion policor i koduar “Black market” çoi në ndalimin e Aleksandër Matos, 28 vjeç, nga Shkodra, i cili u kap në zonën e Alliasit në Tiranë me dy pistoleta në automjetin e tij.

Policia tha se Matoja ka precedent penal për prodhim dhe shitje të lëndëve narkotike dhe konsiderohet pjesë e një grupi të strukturuar kriminal që vepron prej vitesh në Shkodër.

Hetimet paraprake tregojnë se armët e zjarrit dyshohet të ishin destinuar për persona të përfshirë në krime të rënda kundër jetës dhe pronës në Tiranë dhe qytete të tjera.

Skema e përdorur nga grupi dyshohet se përfshinte transportimin e armëve në mënyrë të fragmentuar – pjesë të ndara që më pas montoheshin nga blerësit – për të shmangur zbulimin gjatë kontrolleve.

Noa.al raporton se Matoja ka qenë nën vëzhgim prej disa javësh, pas informacioneve se po ndërmjetësonte blerje armësh për llogari të elementëve kriminalë aktivë.

Arrestimi u krye në momentin e dorëzimit të armëve, ndërsa autoritetet po hetojnë për të identifikuar porositësit dhe rrjetin e shpërndarjes.

Materialet procedurale i janë referuar Prokurorisë së Tiranës, e cila pritet të kërkojë masa sigurie të forta, duke pasur parasysh natyrën e dyshimeve dhe rrezikshmërinë e aktivitetit. Hetimet po shtrihen edhe në Shkodër dhe në qytete të tjera ku mendohet se grupi ka rrjet bashkëpunëtorësh. /noa.al

View this post on Instagram

A post shared by Agjencia Kombëtare e Lajmeve NOA (@noanews)