Prishtinë, 1 Gusht 2025 – Në një ceremoni solemne të mbajtur në Presidencën e Republikës së Kosovës, këngëtarja me famë ndërkombëtare, Dua Lipa, mori zyrtarisht shtetësinë e Kosovës. Në këtë ngjarje të veçantë mori pjesë edhe ambasadori i Mbretërisë së Bashkuar në Kosovë, z. Jonathan Hargreaves, i cili vlerësoi kontributin dhe suksesin global të artistes me origjinë shqiptare.

Përmes një postimi në rrjetet sociale, ambasadori Hargreaves ndau disa momente nga ceremonia, duke e quajtur takimin me Duan “një nder të madh” dhe duke theksuar se “Mbretëria e Bashkuar dhe Kosova janë të dyja krenare që ta quajnë Dua Lipën të tyren”.

> “Faleminderit Presidente Osmani për ftesën në ceremoninë e veçantë ku Dua Lipa u nderua me nënshtetësinë e Republikës së Kosovës. Ishte një nder i madh të takoja Duan dhe të festonim një talent kaq të veçantë. Pres me padurim të shoh performancën e saj sonte në Sunny Hill Festival. Mos harroni të na vizitoni në #BritishCorner gjatë festivalit”, shkroi ambasadori.

Dua Lipa, e njohur për kontributin e saj në muzikën ndërkombëtare dhe për promovimin e kulturës shqiptare, është gjithashtu themeluese e festivalit “Sunny Hill” në Prishtinë, i cili po mbahet gjatë këtyre ditëve dhe ka sjellë emra të njohur të skenës botërore në Kosovë.