Prizren, 31 korrik 2025 – Shtatorja e Heroit Kombëtar Gjergj Kastrioti Skënderbeu në Prizren është dëmtuar nga një akt vandalizmi, teksa përkrenarja dhe shpata e figurës monumentale janë lyer me ngjyrë ari. Ngjarja ka shkaktuar reagime të ashpra në opinionin publik dhe është dënuar gjerësisht si një cenim i rëndë ndaj simboleve kombëtare dhe kujtesës historike të shqiptarëve.

Qytetarë dhe intelektualë vendas kanë shprehur indinjatën e tyre, duke e cilësuar aktin si të papranueshëm dhe të rrezikshëm për unitetin shoqëror. Komuna e Prizrenit reagoi zyrtarisht duke sqaruar se ndërhyrja nuk është pjesë e ndonjë restaurimi të miratuar dhe se është kryer pa lejen apo dijeninë e autoriteteve vendore.

Policia e Kosovës ka nisur hetimet për të identifikuar autorin apo autorët përgjegjës për vandalizmin, ndërsa monumenti po monitorohet nga afër.

Shtatorja e Skënderbeut është vendosur më 28 nëntor 2020 në rrethrrotullimin e rrugës “Hasan Prishtina” në Prizren dhe përfaqëson një nga simbolet më domethënëse të qytetit, pranë vendit ku është mbajtur edhe Lidhja Shqiptare e Prizrenit, një ngjarje kyçe në historinë e vetëdijes kombëtare shqiptare.