Tiranë, 30 Korrik 2025 – Kryeministri i Shqipërisë ka njoftuar sot përmes një postimi në rrjetet sociale se duke filluar nga data 1 gusht, në të gjithë sistemin shëndetësor, publik dhe privat, do të hyjë në fuqi modeli i ri i recetës mjekësore.

Sipas njoftimit zyrtar, kjo nismë synon të përmirësojë ndjeshëm cilësinë e shërbimit shëndetësor dhe të rrisë sigurinë për qytetarët, duke siguruar një ndjekje më të saktë të trajtimit mjekësor.

Pikat kyçe të modelit të ri përfshijnë:

Përcaktim i detyrueshëm i diagnozës në recetë, për të udhëzuar saktë farmacistin në lëshimin e barnave.

Recetë afatgjatë deri në 6 muaj, në rastet kur pacientët kanë nevojë për trajtim të vazhdueshëm.

Emërtimi gjenerik i barit, doza dhe mënyra e përdorimit do të jenë të detyrueshme për të shmangur keqkuptimet apo përdorimin e pasaktë të barnave.

Firmë dhe vulë nga farmacisti, si garanci për sigurinë dhe origjinën e trajtimit të përshkruar.

Zbatimi i këtij modeli vjen si pjesë e përpjekjeve për modernizimin e shërbimit shëndetësor dhe vendosjen e standardeve më të larta të praktikës mjekësore në vend.