Kamchatka, 30 korrik 2025 – Pas një tërmeti të fuqishëm me magnitudë 8.8 ballë që goditi rajonin lindor të Rusisë, vullkani Klyuchevskoy në gadishullin Kamchatka ka shpërthyer me forcë, duke lëshuar një re të madhe hiri që ka arritur një lartësi prej 3 kilometrash mbi nivelin e detit.

Sipas Ekipit të Reagimit ndaj Shpërthimeve Vullkanike të Kamchatka-s (KVERT), pjesë e Institutit të Vullkanologjisë dhe Sizmologjisë të Akademisë ruse të Shkencave, aktiviteti shpërthyes është i vazhdueshëm. Reja e hirit është përhapur deri në 58 kilometra në lindje të vullkanit, ndërsa krateri thuhet se është pothuajse i mbushur me llavë, duke rritur rrezikun për rrjedhje të fuqishme lavash në zonat përreth.

“Emetimet e hirit në lartësi deri në 8 kilometra mund të ndodhin në çdo moment. Aktiviteti mund të ndikojë në fluturimet në lartësi të ulët”, thuhet në njoftim. Autoritetet kanë lëshuar një kod portokalli për aviacionin, megjithatë linjat ndërkombëtare të fluturimit nuk kalojnë nëpër zonën e vullkanit Klyuchevskoy.

Klyuchevskoy, i njohur edhe si Kluchevskaya Sopka, ndodhet në Kamchatka dhe konsiderohet maja më e lartë e Siberisë si dhe vullkani më i lartë aktiv në Euroazi, me një lartësi prej 4,750 metrash. Ai është pjesë e “Vullkaneve të Kamchatka-s”, të cilët janë përfshirë në Listën e Trashëgimisë Botërore të UNESCO-s. Vullkani është formuar rreth 7,000 vjet më parë dhe karakterizohet nga shpërthime të shpeshta dhe të fuqishme, duke e renditur ndër vullkanet më aktive në planet.