SHKOPET – Reshjet e dendura të shiut gjatë natës kanë shkaktuar probleme të mëdha në zonën e Shkopetit, ku masive gurësh janë rrëshqitur dhe kanë bllokuar rrugën pranë tunelit të Shkopetit. Ndërkohë, masive të tjera gurësh kanë rënë dhe në objektet e kompanisë HEC, madje edhe në vendin ku qëndron roja, fatmirësisht pa shkaktuar pasoja.

Punonjësit e mirëmbajtjes së rrugës Skuraj-Burrel janë mobilizuar menjëherë dhe kanë arritur në vendngjarje në orët e para të mëngjesit për të larguar masivet e gurëve. Po ashtu, është pritur mbërritja e fadromave për hapjen e plotë të këtij aksi rrugor, që është ndërprerë për shkak të bllokimit.

Gjithashtu, reshjet intensive kanë shkaktuar edhe shkulje pyjesh pranë rrugës, duke rritur rrezikun e dëmeve dhe bllokimeve të tjera. Autoritetet janë në terren për të monitoruar situatën dhe ndërhyrë për të garantuar sigurinë e kalimtarëve dhe normalizimin e trafikut.