Pogradec – Një ngjarje e rëndë tronditi mëngjesin e sotëm qytetin e Pogradecit, ku një grua 52-vjeçare u gjet e pajetë në banesën e saj në lagjen nr. 1, e cila ishte përfshirë nga flakët. Viktima është identifikuar si Kozeta Teço.

Burime nga grupi hetimor bëjnë me dije se ngjarja dyshohet të jetë e qëllimshme, me autoritetet që po e trajtojnë rastin si të mundshëm kriminal. Nga këqyrja paraprake e trupit të viktimës, ekspertët mjeko-ligjorë kanë konstatuar shenja të dukshme dhune, duke ngritur dyshime të forta për një akt vrasjeje.

Sipas të dhënave të para, pista kryesore e hetimit është ajo e një konflikti për motive pronësie, që mund të ketë çuar në vrasjen e 52-vjeçares dhe më pas në djegien e banesës, ndoshta për të fshehur gjurmët.

Policia dhe prokuroria po vijojnë hetimet për zbardhjen e plotë të rrethanave të ngjarjes dhe identifikimin e autorit/autorëve të mundshëm.