Shëngjin– Reagimi i shpejtë dhe profesional i Policisë ka bërë të mundur gjetjen e një vajze 9-vjeçare nga Kosova, e cila ishte larguar nga prindërit dhe humbi kontaktet me ta në plazhin e Shëngjinit.

Salla Operative e DVP Lezhë mori një njoftim urgjent nga një familje pushuesish kosovarë, të cilët raportuan se vajza e tyre ishte larguar dhe nuk po mund të gjendej. Pas marrjes së njoftimit, shërbimet e Policisë që patrullojnë me biçikleta në zonën e plazhit u angazhuan menjëherë në kërkime intensive.

Falë reagimit të menjëhershëm, punonjësit e Policisë gjetën vajzën e mitur dhe, pasi konfirmuan se ishte në gjendje të mirë shëndetësore, ia dorëzuan familjes së saj.

Prindërit e vajzës shprehën mirënjohjen e tyre për shërbimet e Policisë për reagimin e shpejtë dhe për kujdesin e treguar gjatë kërkimeve.

Policia e Shtetit apelon për kujdes të shtuar nga pushuesit për të siguruar sigurinë e fëmijëve, duke i inkurajuar ata të mbajnë një vëmendje të vazhdueshme ndaj tyre gjatë pushimeve.