Tiranë, 25 korrik 2025 – Një zjarr i përmasave të konsiderueshme ka përfshirë një transformator elektrik në fshatin Ibë të njësisë administrative Petrelë në Tiranë. Ngjarja ndodhi në orët e para të pasdites, duke shkaktuar shqetësim te banorët e zonës.

Sipas dëshmitarëve, flakët janë shfaqur papritur dhe janë shoqëruar me tym të zi e të dendur, i cili është përhapur në të gjithë lagjen përreth. Pamje nga vendi i ngjarjes tregojnë sasi të mëdha tymi që ngrihen nga transformatori i dëmtuar.

Në vendngjarje kanë mbërritur forcat zjarrfikëse të Tiranës, të cilat kanë bërë të mundur izolimin e flakëve dhe shmangien e përhapjes së zjarrit në banesat përreth. Deri më tani nuk raportohet për të lënduar, ndërsa shkaku i zjarrit është ende i paqartë.

Autoritetet kanë nisur hetimet për të përcaktuar nëse bëhet fjalë për një defekt teknik apo ndonjë faktor tjetër.