Tiranë, 25 Korrik 2025 – Ambasada e Shteteve të Bashkuara në Tiranë ka dhënë sqarime të rëndësishme lidhur me afatet e vizave amerikane dhe kohëzgjatjen e qëndrimit për vizitorët ndërkombëtarë në SHBA.

Në një postim në rrjetet sociale, Ambasada thekson se data e skadencës së vizës nuk përcakton automatikisht kohëzgjatjen e lejuar të qëndrimit në Shtetet e Bashkuara.

Sipas njoftimit, është Oficeri i Doganës dhe Mbrojtjes së Kufirit (CBP) ai që cakton në momentin e mbërritjes në pikën e hyrjes, datën deri kur vizitori mund të qëndrojë ligjërisht në SHBA.

“Një vizë amerikane ju lejon të udhëtoni drejt një pike hyrjeje në Shtetet e Bashkuara dhe të kërkoni leje për të hyrë në vend. Kohëzgjatja e qëndrimit tuaj përcaktohet nga Oficeri i Doganës dhe Mbrojtjes së Kufirit (CBP) në momentin e mbërritjes suaj,” thuhet në komunikatën e Ambasadës.

“Oficeri i Doganës dhe Mbrojtjes së Kufirit vendos datën ‘prano deri më…’ në momentin e mbërritjes, jo nga data e skadencës së vizës,” përfundon njoftimi.