Gjirokastër, 25 Korrik 2025 – Një 54-vjeçar është proceduar penalisht pasi u kap nga Policia Kufitare duke tentuar të nxjerrë jashtë territorit të Shqipërisë një shumë të madhe parash pa e deklaruar.

Gjatë kontrollit të ushtruar në dalje të vendit, në çantën e shtetasit Sh. B., banues në fshatin Lazarat, Gjirokastër, u gjetën 48 400 euro të padeklaruara, në kundërshtim me detyrimet ligjore për kalimin e kufirit me vlera monetare.

Specialistët për Hetimin e Krimeve të Drejtorisë Vendore për Kufirin dhe Migracionin (DVKM) Gjirokastër referuan materialet në Prokurori, ku nisi procedimi penal në gjendje të lirë ndaj 54-vjeçarit për veprën penale “Mosdeklarimi në kufi i të hollave dhe i sendeve me vlerë”.

Shuma e eurove u sekuestrua në cilësinë e provës materiale, ndërkohë që materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme ligjore.