Tiranë, 25 Korrik 2025 – Qeveria ka publikuar çmimet e reja të referencës për pasuritë e paluajtshme në 61 bashki të vendit. Këto çmime nuk do të ndikojnë vetëm në shitblerjen e pronave, por edhe në rritjen automatike të taksës së ndërtesës që paguajnë qytetarët për apartamentet apo njësitë tregtare.

Taksa e ndërtesës për banesat në Shqipëri llogaritet si 0.05% e vlerës së apartamentit, e cila përcaktohet nga çmimi referencë për zonën përkatëse. Rritja e çmimit të referencës do të sjellë një rritje të njëjtë në përqindje edhe të taksës.

Shembull nga qyteti i Vlorës: Çmimi aktual i referencës është 61,800 lekë për metër katror. Për një apartament 90 m², vlera është 5,562,000 lekë, dhe taksa vjetore del 2,781 lekë.

Çmimi i ri i propozuar është 98,000 lekë/m². Për të njëjtin apartament, vlera shkon në 8,820,000 lekë, dhe taksa vjetore bëhet 4,410 lekë.

Pra, qytetari në këtë rast do të paguajë 1,629 lekë më shumë në vit – ose rreth 58.6% rritje, sa edhe rritja e çmimit të referencës.

Kjo rritje do të prekë shumicën e qytetarëve në rrethe, të cilët do të paguajnë më shumë për pronën që zotërojnë, si për banim ashtu edhe për biznes.