Tiranë, 24 Korrik 2025 – Drejtoria e Hetimit të Krimit Kibernetik në Policinë e Shtetit ka dhënë një paralajmërim zyrtar për qytetarët, në lidhje me një skemë mashtruese që po qarkullon së fundmi përmes SMS-ve dhe aplikacioneve të komunikimit elektronik.

Sipas njoftimit, persona ende të paidentifikuar po dërgojnë mesazhe që përmbajnë linke të rreme, të cilat pretendojnë se kanë qëllim përditësimin e të dhënave bankare apo verifikimin e llogarive personale. Pas klikimit në këto linke dhe plotësimit të të dhënave, autorët arrijnë të aksesojnë llogaritë bankare të qytetarëve dhe në disa raste kanë kryer vjedhje të shumave të konsiderueshme parash.

Policia e Shtetit thekson se asnjë institucion bankar apo shtetëror nuk kërkon të dhëna sensitive (si numra kartash bankare, kode PIN apo fjalëkalime) përmes SMS-ve apo linkeve të paautorizuara.

Udhëzime për qytetarët: Mos klikoni në asnjë link të dërguar nga burime të panjohura.

Mos ndani të dhënat tuaja personale apo bankare në forma të dyshimta online.

Verifikoni çdo kërkesë të tillë direkt pranë institucionit përkatës (bankë apo agjenci shtetërore).

Raportoni menjëherë çdo rast të dyshuar te strukturat e hetimit të krimit kibernetik ose në numrin e urgjencës 112.

Policia e Shtetit njofton se vijon të ndjekë me prioritet rastet e mashtrimeve online dhe po bashkëpunon ngushtë me institucionet financiare dhe partnerët ndërkombëtarë për të identifikuar dhe ndjekur penalisht autorët e këtyre veprave.

Mos u bëni viktimë e mashtrimeve digjitale – ruani të dhënat tuaja personale dhe financiare!

NJOFTIMI I POLICISË:

Policia e Shtetit

Drejtoria e Hetimit të Krimit Kibernetik në Policinë e Shtetit informon opinionin publik lidhur me një skemë mashtruese që po qarkullon së fundi, përmes mesazheve SMS dhe aplikacioneve të komunikimit elektronik.

Shtetas ende të paidentifikuar po dërgojnë mesazhe që përmbajnë linke të rreme, me pretendimin se është i nevojshëm përditësimi i të dhënave bankare ose verifikimi i llogarisë së qytetarëve. Pasi qytetarët klikojnë mbi këto linke dhe japin të dhënat e tyre personale apo bankare, autorët e këtyre veprimeve arrijnë të aksesojnë llogaritë bankare dhe në shumë raste, kanë realizuar vjedhjen e shumave të konsiderueshme monetare.

Policia e Shtetit thekson se asnjë institucion bankar apo shtetëror nuk kërkon përmes SMS-ve apo linkeve të dyshimta dërgimin e të dhënave sensitive, si numrat e kartave bankare, kodet PIN apo kredencialet e tjera të sigurisë.

Për këtë arsye, iu bëjmë thirrje të gjithë qytetarëve:

Të mos klikojnë në asnjë link të dërguar nga burime të panjohura;

Të mos japin të dhënat e tyre personale apo bankare në forma të dyshimta online;

Të verifikojnë çdo informacion të tillë drejtpërdrejt me institucionin përkatës (bankë apo agjenci shtetërore);

Të raportojnë menjëherë çdo rast të dyshuar pranë strukturave të hetimit të krimit kibernetik në Policinë e Shtetit.

Policia e Shtetit vijon të ndjekë me prioritet këto raste dhe po bashkëpunon ngushtë me institucionet financiare dhe partnerët, për identifikimin dhe ndjekjen penale të autorëve.

Respektoni sigurinë tuaj digjitale! Mos ndani të dhëna personale me burime të pasigurta!