Ankara- Të paktën 10 punonjës kanë humbur jetën teksa luftonin me zjarret që shpërthyen në provincën Eskisehir të Turqisë, në një situatë tragjike që u shkaktua nga një ndryshim i papritur në drejtimin e erës. Rreth 24 punonjës pyjorë dhe vullnetarë shpëtimi mbetën të bllokuar brenda zjarrit, sipas Ministrit të Bujqësisë të Turqisë, Ibrahim Yumakli, i cili e shpalli këtë informacion në një postim në X (ish Twitter).

Nga të dhënat, pesë punonjës pyjorë dhe pesë vullnetarë nga organizata AKUT e shpëtimit humbën jetën, ndërsa 14 të tjerë u dërguan në spital për mjekim. Zjarri filloi të martën në mëngjes në distriktin Seyitgazi dhe pati një përhapje të shpejtë drejt zonave të tjera të afërta.

Presidenti turk, Recep Tayyip Erdogan, shprehu ngushëllimet për tragjedinë. "Lutem për mëshirën e Zotit për vëllezërit dhe motrat tona që luftuan me koston e jetës së tyre për të mbrojtur pyjet tona. Ngushëllimet e mia shkojnë për familjet e tyre dhe për të gjithë popullin turk", tha Erdogan.

Për situatën në komunitetin e prekura, deputeti Nebi Hatipoglu shprehu një pikëllim të thellë për humbjen e punonjësve heroikë të pyllit që kanë vdekur ndërsa luftonin për të mbrojtur natyrën nga zjarret.

Në pjesën tjetër të Turqisë, temperaturat kanë kaluar 40°C, duke kontribuar në shpërthimin e zjarreve të shumta në pesë zona të ndryshme: Sakarya, Bilecik, Eskisehir, Izmir, Karabuk dhe Manisa. Qindra zjarre janë shpërthyer gjatë verës, duke detyruar dhjetëra mijëra njerëz të evakuohen nga shtëpitë e tyre.

Shoqata e Kërkim-Shpëtimit AKUT, një organizatë joqeveritare, është e angazhuar në ndihmën dhe shpëtimin e jetëve në situata fatkeqësish si kjo.