Korçë, 23 korrik 2025 – Një aksident rrugor ka ndodhur paraditen e sotme në afërsi të fshatit Dvoran, në rrethin e Korçës, ku një automjet ka dalë nga rruga, duke shkaktuar plagosjen e një çifti bashkëshortësh dhe një këmbësoreje.

Sipas informacioneve paraprake, drejtuesi i mjetit dyshohet se ka humbur kontrollin mbi automjetin, duke përfunduar jashtë traseve të rrugës. Si pasojë e përplasjes, drejtuesi dhe bashkëshortja e tij, e cila ndodhej si pasagjere në automjet, kanë mbetur të plagosur.

Gjithashtu, gjatë aksidentit është dëmtuar edhe një këmbësore, e cila është goditur nga automjeti në momentin e daljes nga rruga.

Të tre të plagosurit janë transportuar me urgjencë drejt Spitalit Rajonal të Korçës, ku po marrin ndihmën mjekësore të nevojshme. Ende nuk dihet gjendja e tyre shëndetësore.

Grupi hetimor ndodhet në vendngjarje dhe po punon për zbardhjen e shkaqeve të aksidentit.