Presidenti i Këshillit Evropian, António Costa, dhe Presidentja e Komisionit Evropian, Ursula von der Leyen, pritet të vizitojnë Kinën të enjten më 24 korrik për të marrë pjesë në Samitin e 25-të Kinë–BE, njoftoi të hënën Ministria e Jashtme kineze në Pekin. Gjatë vizitës, ata do të zhvillojnë edhe një takim me Presidentin Xi Jinping, njoftoi të hënën në Pekin Ministria e Jashtme kineze.

Ministria tha gjithashtu se kryeministri kinez Li Qiang dhe liderët e BE-së do të kryesojnë së bashku Samitin e 25-të Kinë-BE.

Duke dhënë hollësi mbi samitin e ardhshëm në një konferencë shtypi, zëdhënësi i diplomacisë kineze, Guo Jiakun, u shpreh se, ndërsa ndryshimet e papara në një shekull po përshpejtohen, në sfondin e një bote të trazuar, dhe unilateralizmi e praktikat e ngacmimit u kanë dhënë një goditje të rëndë rendit dhe rregullave ndërkombëtare, njerëzimi ndodhet përsëri në një pikë kritike.

Si dy forca kryesore në ndërtimin e një bote shumëpolare, dy tregje të mëdha që mbështesin globalizimin dhe dy qytetërime të mëdha që nxitin larminë kulturore, Samiti Kinë-BE ka një rëndësi të madhe dhe tërheq vëmendje ndërkombëtare, vuri në dukje Guo.

Gjatë mbi gjysmëshekullit të kaluar, pavarësisht sfidave e vështirësive, lidhjet Kinë-BE janë bërë më të pjekura e më të qëndrueshme, duke u shndërruar në një nga marrëdhëniet dypalëshe me ndikim më të madh në botë, tha ai.

Zëdhënësi i diplomacisë kineze, Guo Jiakun/Foto: Ministria e Jashtme e Kinës

Zëdhënësi shtoi që bashkëpunimi ndërmjet të dy palëve ka pasur rezultate të frytshme, duke i dhënë shtysë zhvillimit e përparimit të njëri-tjetrit, duke sjellë përfitime konkrete për gati 2 miliardë banorë të Kinës e vendeve të BE-së, duke kontribuuar ndjeshëm në paqen e zhvillimin botëror dhe duke krijuar një shembull të bashkëpunimit me dobi të ndërsjellë në epokën e globalizimit ekonomik.

Guo tha se në 50 vjetët e fundit, vëllimi vjetor i tregtisë Kinë-Evropë ka arritur nga 2.4 miliardë në 785.8 miliardë dollarë amerikane, kurse vlera e investimeve dypalëshe është ngritur nga pothuajse zero në 260 miliardë dollarë.

Ai theksoi shtimin e shkëmbimeve njerëzore dhe bashkërendimin e bashkëpunimin efektiv në reagimin ndaj ndryshimeve klimatike e në fusha të tjera.