Shëngjin, 19 Korrik 2025 – Detaje të reja janë zbardhur nga ngjarja e rëndë e ndodhur pasditen e sotme në shëtitoren e Shëngjinit, ku një 32-vjeçar humbi jetën teksa po punonte në skenën ku mbrëmjen e sotme pritej të mbahej një koncert me pjesëmarrjen e disa artistëve të njohur shqiptarë.

Viktima është identifikuar si Zef Lorenci, banues në fshatin Mërqi të Lezhës. Sipas të dhënave paraprake, i riu ka rënë në kontakt me energjinë elektrike ndërsa punonte në instalimet teknike të skenës. Si pasojë e goditjes elektrike, ai ka humbur ekuilibrin dhe ka rënë nga një skelë, rënie që ka rezultuar fatale.

Ngjarja ndodhi rreth orës 16:45 dhe është konfirmuar se në skenën ku ndodhi aksidenti, ishte planifikuar të performonin emra të njohur të muzikës shqiptare, si pjesë e një eventi veror që po zhvillohet në zonën turistike të Shëngjinit.

Pamjet nga vendngjarja tregojnë skenën tashmë të rrethuar me shirita sigurie, ndërsa forcat e Policisë dhe grupi hetimor ndodhen në vend për të përcaktuar rrethanat e sakta të ngjarjes. Po verifikohet gjithashtu nëse janë respektuar masat e sigurisë në punë dhe standardet teknike gjatë montimit të pajisjeve elektrike.

Tragjedia ka tronditur organizatorët dhe banorët e zonës, ndërsa nuk dihet ende nëse koncerti i planifikuar do të anulohet apo shtyhet.