Shëngjin, 19 Korrik 2025 – Një ngjarje tragjike është regjistruar pasditen e sotme në shëtitoren e Shëngjinit, pranë bustit “Willson”, ku një 32-vjeçar ka humbur jetën teksa punonte për ngritjen e skenës së një koncerti.

Viktima është identifikuar si Zef Lorenci, banues në fshatin Mërqi të Lezhës. Sipas informacioneve paraprake, i riu ka rënë në kontakt me energjinë elektrike gjatë punës dhe, si pasojë, ka humbur ekuilibrin duke rënë nga një skelë. Rënia ka rezultuar fatale, duke i shkaktuar vdekjen e menjëhershme.

Ngjarja ndodhi rreth orës 16:45 dhe në vendngjarje ndodhen forcat e Policisë, grupi hetimor dhe ekspertë të fushës për të përcaktuar shkakun e saktë të incidentit, si dhe për të verifikuar nëse janë respektuar protokollet e sigurisë teknike në vendin e punës.

Pamje të publikuara nga vendi i ngjarjes tregojnë skenën e rrethuar me shirit sigurie, ndërsa pritet që organizatorët e koncertit dhe autoritetet përkatëse të japin një reagim zyrtar.

Ngjarja ka tronditur komunitetin dhe ka rikthyer në vëmendje nevojën për zbatimin rigoroz të masave të sigurisë për punëtorët sezonalë, sidomos në aktivitetet publike me përfshirje teknike të rrezikshme.