Një incident i rëndë ka ndodhur të mërkurën pasdite në një qendër imazherie në Long Island, duke lënë një burrë 61-vjeçar në gjendje kritike.

Ngjarja ndodhi në ambientet e Nassau Open MRI, ku burri hyri në dhomën e rezonancës magnetike me një zinxhir të rëndë metalik rreth qafës. Në atë moment, pajisja MRI ishte në funksion, dhe forca e fuqishme magnetike e tërhoqi me dhunë objektin metalik, duke shkaktuar dëmtime serioze për 61-vjeçarin.

Sipas autoriteteve, viktima nuk kishte leje të hynte në dhomën e specializuar dhe pësoi menjëherë një “incident mjekësor” sapo u afrua te skaneri. Ai u dërgua me urgjencë në spital, ku vazhdon të mbetet i shtruar me lëndime të rënda.

Policia dhe autoritetet shëndetësore po hetojnë për të kuptuar se si ndodhi ky aksident i pazakontë dhe pse nuk u shmang hyrja e tij me objekt metalik në një zonë me rrezik të lartë.