Shkodër, 17 korrik 2025 – Operacioni policor i koduar “Koordinata” ka çuar në zbulimin dhe asgjësimin e 3,126 bimëve narkotike Cannabis Sativa në disa zona të qarkut Shkodër. Në vijim të hetimeve, janë proceduar penalisht dy kryetarë fshatrash dhe një roje mjedisi për shpërdorim detyre.

Operacioni u zhvillua nga Drejtoria Vendore e Policisë Shkodër në bashkëpunim me komisariatet përkatëse, me qëllim goditjen e kultivimit të lëndëve narkotike në zona të thella dhe të mbuluara nga terreni i vështirë malor.

Në njësitë administrative Shalë, Pult, Shosh dhe Ana e Malit u gjetën dhe asgjësuan 922 bimë narkotike. Për këtë rast, është proceduar kryetari i fshatit Oblikë, shtetasi S. P.

Ndërsa në Kastrat dhe Kelmend u zbuluan dhe asgjësuan 1,034 bimë kanabis. Pas hetimeve, janë proceduar kryetari i fshatit Selcë, A. D., dhe roja i mjedisit i zonës, P. G.

Në zonat Temal dhe Shllak, Komisariati i Vaut të Dejës sekuestroi dhe asgjësoi 1,170 bimë të tjera kanabisi.

Policia ka theksuar se operacioni “Koordinata” vijon me intensitet në të gjithë territorin e qarkut Shkodër, ndërkohë që po punohet për identifikimin dhe arrestimin e autorëve përgjegjës për kultivimin e paligjshëm të bimëve narkotike.