Tiranë, 15 korrik 2025 – Policia e Tiranës ka finalizuar me sukses operacionin e koduar “Origjina”, duke sekuestruar katër pasuri me vlerë rreth 287 000 euro, të dyshuara si produkte të veprimtarive kriminale të kryera jashtë vendit.

Në kuadër të këtij operacioni, u ekzekutua vendimi i Gjykatës së Tiranës për sekuestrimin e 2 apartamenteve dhe 2 automjeteve, në pronësi të shtetasit A. L., 53 vjeç. Pasuritë dyshohet se janë përfituar nga të ardhurat e veprimtarisë kriminale në Itali, ku 53-vjeçari ka qenë i dënuar me 9 vjet burg dhe 60 000 euro gjobë, për veprën penale “Shfrytëzimi i prostitucionit”, kryer në kuadër të një grupi të strukturuar kriminal.

Operacioni u zhvillua nga Specialistët e Seksionit për Hetimin e Pastrimit të Parave dhe Aseteve Kriminale, në bashkëpunim me Agjencinë e Administrimit të Aseteve të Sekuestruara dhe të Konfiskuara, nën drejtimin e Prokurorisë së Tiranës.

Materialet procedurale janë referuar Prokurorisë për veprime të mëtejshme, ndërsa hetimet vazhdojnë për të identifikuar pasuri të tjera të mundshme të përfituara në mënyrë të paligjshme.