Lezhë, 15 korrik 2025 – Pas disa muajsh hetime të thelluara me metoda proaktive, Policia e Lezhës finalizoi me sukses operacionin e koduar “Coast Strike”, për goditjen e veprimtarisë kriminale të shpërndarjes së drogës në zonat bregdetare.

Në kuadër të operacionit u arrestua në flagrancë Denis Huti, 50 vjeç, banues në fshatin Balldre i Ri, i cili dyshohet se shiste doza kanabisi në zonën turistike të Shëngjinit.

Gjatë kontrollit fizik ndaj tij, si dhe në banesën e 50-vjeçarit, policia gjeti dhe sekuestroi:

Dhjetëra doza kanabisi,

1 peshore elektronike,

1 aparat celular, të cilët dyshohet se përdoreshin për aktivitetin e paligjshëm.

Operacioni u zhvillua nga Seksioni për Hetimin e Narkotikëve në bashkëpunim me Seksionin e Mbështetjes Operacionale dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Lezhë.

Ndaj Denis Hutit rëndon akuza për “Prodhim dhe shitje të narkotikëve”, ndërsa hetimet vijojnë për identifikimin e personave të tjerë të përfshirë në këtë rrjet.