Gaza, 15 korrik 2025 – Banorët e Gazës po përballen me një krizë të rëndë humanitare, ku mungesa e ujit të pijshëm dhe kushteve bazë higjieno-sanitare po rrezikon jetën e mijëra civilëve, veçanërisht pas një sulmi ajror izraelit në një pikë shpërndarjeje uji që la tetë të vrarë.

Familja al-Manasra, që jeton në një kamp me tenda pranë rrënojave të Qytetit të Gazës, rrëfen për vuajtjen e përditshme për të siguruar ujë, ndërsa fëmijët e tyre janë të infektuar me sëmundje të lëkurës dhe vuajnë nga diarreja për shkak të mungesës së ujit të pastër. “Nuk ka ujë, nuk ka ilaçe dhe nuk ka spitale”, shprehet Akram Manasra, 51 vjeç, ndërsa përshkruan kushtet mjerane në të cilat përpiqet të mbijetojë familja e tij 10-anëtarëshe.

Të dielën, një raketë izraelite goditi një radhë njerëzish që prisnin të merrnin ujë në kampin e refugjatëve Nuseirat. Ushtria izraelite deklaroi se kishte synuar militantë, por raketa nuk e goditi objektivin. Ky incident tragjik është vetëm një ilustrim i situatës ekstreme që ka përfshirë Gazën, pas 21 muajsh lufte dhe katër muajsh bllokadë.

Sipas raportit të fundit të OCHA, agjencisë humanitare të OKB-së, mungesa e karburantit ka çuar në ndërprerjen e shërbimeve të ujit, kanalizimeve dhe të menaxhimit të mbeturinave, duke shtuar rrezikun e ndotjes së ujit dhe përhapjes së sëmundjeve si verdhëza dhe diarea.

Zëdhënësi i UNICEF-it, James Elder, paralajmëroi se: “Nëse do të lejohej energjia elektrike për impiantet e shkripëzimit, mungesa vdekjeprurëse e ujit në Gaza mund të zgjidhej brenda 24 orëve.” Ai e konsideroi të pajustifikueshme mohimin e ujit për familjet në nevojë.

Ndërkohë, autoritetet izraelite deklarojnë se lejojnë karburant të mjaftueshëm për në Gaza, por nuk mbajnë përgjegjësi për shpërndarjen e tij brenda territorit. Për banorët e Gazës, kjo do të thotë se përpjekja për të gjetur ujë është kthyer në një sfidë jetike të përditshme dhe shpesh të rrezikshme.

Brenda tendave, banorët përdorin një sistem të improvizuar për të ricikluar ujin: pas larjes me duar dhe lugë, uji përdoret për enë, rroba dhe në fund, për pastrim bazik, duke shtuar rrezikun për infeksione dhe sëmundje. “Kanë kaluar tre muaj që nuk i kemi larë mbulesat”, thotë Manasra, ndërsa gruaja e tij, Umm Khaled, shton: “Fëmijët janë sëmurë rëndë nga nxehtësia dhe uji i ndotur. Po s’ka ç’të bëjmë, ky është uji i vetëm që kemi.”

Situata në Gaza është kthyer në një alarm të vazhdueshëm humanitar, ku mungesa e burimeve bazë si uji po i shton dhimbjen një popullsie tashmë të traumatizuar nga lufta, uria dhe izolimi.