Tiranë, 14 korrik 2025 – Një 37-vjeçar u arrestua këtë të hënë në Tiranë, pasi gjatë kontrollit nga Policia Rrugore për përdorim të celularit në timon, rezultoi se ishte i shpallur në kërkim ndërkombëtar nga autoritetet spanjolle.

Shtetasi i arrestuar është Ndriçim Sula. Ai u ndalua nga shërbimet e Policisë Rrugore të Tiranës gjatë monitorimeve të zakonshme në rrugët e kryeqytetit, teksa përdorte celularin gjatë drejtimit të automjetit. Pas verifikimeve dhe shkëmbimit të informacionit me Interpol Tiranë, u konstatua se Sula ishte në kërkim për llogari të Spanjës.

Gjykata e Seu de Urgell në Spanjë i ka caktuar atij masën e sigurisë “Arrest me burg”, për veprën penale “Mashtrim me pasoja të rënda”, të kryer në kuadër të një organizate kriminale.

Arrestimi i tij u bë në kuadër të operacionit ndërkombëtar “The Wanted”, ndërsa Policia e Shtetit njofton se Interpol Tirana vijon bashkëpunimin me Interpol Madridin për procedurat e ekstradimit të tij në Spanjë.

Tiranë/Vijon operacioni policor ndërkombëtar, i koduar “The Wanted”.

Kapet nga Policia Rrugore e Tiranës, pjesëtari i një organizate kriminale të akuzuar në Spanjë, për mashtrim me pasoja të rënda.

Gjatë monitorimit sistematik që kryhet në të gjitha akset e kryeqytetit, me pajisje bashkëkohore dhe shërbime të shtuara, shërbimet e Policisë Rrugore të Tiranës konstatuan shtetasin N. S., 37 vjeç, duke përdorur celularin, gjatë drejtimit të automjetit. Nga verifikimet e kryera menjëherë pas ndalimit dhe shkëmbimit të informacionit me Interpol Tiranë rezultoi se 37-vjeçari ishte në kërkim për llogari të autoriteteve spanjolle.

Gjykata e Seu de Urgell i ka caktuar masën e sigurisë “Arrest në burg”, për veprën penale “Mashtrimi”, me pasoja të rënda, kryer në kuadër të organizatës kriminale.

Në përfundim të veprimeve procedurale, shërbimet e Komisariatit të Policisë Nr. 2 arrestuan provizorisht, në kuadër të operacionit "The Wanted", shtetasin N. S., për ekstradimin e të cilit Interpol Tirana vijon bashkëpunimin me Interpol Madridin.