Durrës, 11 korrik 2025 – Kryeministri Edi Rama ka urdhëruar sot nga Durrësi shkarkimin e të gjithë kryetarëve të njësive administrative në vend, duke vendosur si afat përfundimtar ditën e hënë. Lëvizja vjen në kuadër të një reformimi të thellë të administratës vendore.

Në Durrës, procesi ka nisur që një ditë më parë. Në përputhje me kërkesat e një takimi të zhvilluar tri ditë më parë në Bashkinë e qytetit, administratorët e pesë njësive administrative kanë dhënë dorëheqjen: Kadri Gjyla (Ishëm), Edlir Cërri (Sukth), Muharrem Sula (Manëz), Eltion Preni (Katund i Ri) dhe Albert Bukaçi (Rrashbull).

Po ashtu, janë larguar nga detyra administratorët e gjashtë rajoneve urbane të Durrësit: Roland Çobani, Ilir Ngresi, Myslym Hasanaj, Davide Ndoi, Jurgen Tabaku dhe Jetmir Pupla.

Dorëheqjet kanë përfshirë edhe një numër të konsiderueshëm drejtorësh në Bashkinë e Durrësit dhe në drejtoritë rajonale. Ata do t’i nënshtrohen një procesi vlerësimi nga një komision i posaçëm i drejtuar nga kryebashkiakja Emiriana Sako.

Sipas burimeve nga Partia Socialiste në Durrës, për drejtuesit e rinj do të shqyrtohen jo vetëm kandidatura të reja, por edhe disa prej drejtorëve të dorëhequr që mund të rikthehen, si dhe ish-kandidatë për deputetë në qarkun e Durrësit që nuk arritën të siguronin mandat në zgjedhjet e 11 majit.

Sipas ultimatumit gjatë takimit me krzebashkiakët sot, të tjerët në mbarë vendin duhet të japin dorëheqjen brenda së hënës.