Tekniku i Vllaznisë, Edi Martini, ka komentuar humbjen 1-0 në ndeshjen ndaj Daugavpils në kuadër të Conference League, duke shprehur pakënaqësinë e tij për rezultatet, por edhe besimin se ekipi mund të rikuperojë në ndeshjen e kthimit.

"Natyrisht që jam i mërzitur, pasi kishim disa mundësi dhe duhej të shënonim. E zotëruam tërësisht lojën, por pësuam një gol në fund që mund ta kishim evituar. Kemi ndryshuar 4 lojtarë në formacion që nga muaji i kaluar dhe nuk ia dolëm të mbajmë ritmin e lojës", u shpreh Martini.

Trajneri i Vllaznisë u shpreh se një rezultat 0-0 do të ishte më i mirë se humbja 1-0, por mbetet optimist për ndeshjen e kthimit: "Sido që të dalë kjo ndeshje, kemi edhe një ndeshje tjetër. Kam besim te djemtë dhe mendoj se mund ta kthejmë këtë rezultat. Ky është një ekip i vështirë, që mbrojnë shumë mirë, sidomos kur futen 10 lojtarë në zonën e 30 metërshit. Megjithatë, 1-0 është një rezultat që mund ta kthejmë. Mendoj se jemi më lart se ata."

Në fund, Martini bëri të ditur se ekipi po priste përforcime të tjera: "Po presim disa lojtarë dhe jemi në bisedime me disa prej tyre. Është e domosdoshme të kalojmë këtë tur, jo vetëm për aspektin sportiv, por edhe për financat e klubit. Pavarësisht gjithçkaje, do të luftojmë deri në fund për kualifikimin."