Kukës, 10 korrik 2025 – Një konflikt i ashpër mes dy vëllezërve ka ndodhur në një banesë në Kukës, duke përfunduar me ndërhyrjen e menjëhershme të Policisë dhe arrestimin e të dyve.

Sipas njoftimit zyrtar të Policisë, shtetasit A. T., 33 vjeç, dhe E. T., 42 vjeç, janë konfliktuar fizikisht me njëri-tjetrin duke përdorur sende të forta. Ngjarja ka ndodhur brenda ambienteve të banesës së tyre. Pas përplasjes, A. T. ka thyer xhamin e automjetit të vëllait të tij, duke shkaktuar dëme materiale.

Shërbimet e Komisariatit të Policisë Kukës, në bashkëpunim me Forcën e Posaçme “Shqiponja”, kanë ndërhyrë me shpejtësi për të parandaluar përshkallëzimin e konfliktit dhe kanë arrestuar në flagrancë të dy vëllezërit.

Materialet procedurale i janë referuar Prokurorisë për vijimin e hetimeve.

Njoftimi i policisë:

Shërbimet e Komisariatit të Policisë Kukës, pas njoftimit se 2 vëllezër po konfliktoheshin me njëri-tjetrin, kanë organizuar menjëherë punën dhe kanë ndërhyrë në bashkëpunim me shërbimet e Forcës së Posaçme “Shqiponja”, për parandalimin e përshkallëzimit të konfliktit.

Si rezultat i ndërhyrjes së shpejtë dhe profesionale të shërbimeve të Policisë, u arrestuan në flagrancë shtetasit A. T., 33 vjeç dhe E. T., 42 vjeç, banues në Kukës, vëllezër.

Këta shtetas janë konfliktuar me sende të forta me njëri-tjetrin, në banesë. Më pas, shtetasi A. T. ka thyer xhamin e automjetit të vëllait të tij, shtetasit E. T.

Materialet procedurale i kaluan Prokurorisë, për veprime të mëtejshme.