Bruksel- Raporti i BE për Shqipërinë: Vlerësime për SPAK-un, kritika për KLP-në, KLGJ-në dhe komisionin XhafajBruksel, 9 korrik 2025 — Parlamenti Europian ka miratuar raportin e fundit për ecurinë e Shqipërisë në rrugën drejt Bashkimit Europian, ku vlerësohet progresi i bërë, por nënvizohet nevoja për përshpejtimin e reformave në drejtësi dhe forcimin e institucioneve demokratike.

Në raportin prej 18 faqesh, një vëmendje e veçantë i kushtohet funksionimit të sistemit të drejtësisë pas procesit të vetingut, ku shprehen shqetësime për mungesën e transparencës dhe efektivitetit në dy organet kryesore: Këshillin e Lartë Gjyqësor dhe Këshillin e Lartë të Prokurorisë.

“KLGJ-së i mungojnë rregullat e brendshme për të ushtruar funksionet në mënyrë efektive, ndërsa ato të KLP-së kërkojnë rishikim të menjëhershëm. Asnjëri nga këto dy institucione nuk ka miratuar rregullore për menaxhimin e konflikteve të interesit të anëtarëve të vet,” thuhet në raport.

Ndërkohë, vlerësimi më i lartë i është dhënë SPAK-ut, i cili konsiderohet një nga institucionet më të suksesshme në luftën kundër korrupsionit dhe krimit të organizuar në nivelet e larta të pushtetit.

“SPAK ka treguar pavarësi, qasje strategjike dhe rezultate të prekshme, pavarësisht presioneve politike dhe ndikimit të grupeve të krimit të organizuar. Duhet garantuar mbështetje e plotë dhe mosndërhyrje në punën e tij,” thekson raporti.

Shqetësime janë ngritur edhe për funksionimin e Gjykatës Kushtetuese, ku vihet në dukje pasiguria ligjore në procesin e rinovimit të saj dhe moszbatimi i disa vendimeve nga institucionet shtetërore, përfshirë Kuvendin.

Kritika janë adresuar edhe ndaj Komisionit për Reformën në Drejtësi, i njohur si “Komisioni Xhafaj”, për të cilin thuhet se ka pasur mangësi në ndikimin real për thellimin e reformës.

Në përmbyllje, eurodeputetët riafirmojnë mbështetjen për objektivin e Shqipërisë që të përmbyllë negociatat e anëtarësimit deri në vitin 2027, por theksojnë nevojën për hapa më të guximshëm dhe të qëndrueshëm në drejtim të forcimit të shtetit të së drejtës.