Durrës, 8 korrik 2025 – Një 17-vjeçar është arrestuar nga policia e Durrësit, pasi ishte shpallur në kërkim prej dy muajsh për plagosje të rëndë me dashje. I riu kishte goditur me thikë një person më 14 maj 2025 dhe kishte qenë në arrati deri në lokalizimin e tij nga forcat e rendit.

Operacioni policor i koduar “Wanted” u zhvillua në lagjen nr. 8 të qytetit të Durrësit, ku 17-vjeçari u lokalizua dhe u vu në pranga nga specialistët e Krimeve të Rënda, në bashkëpunim me shërbimet operacionale dhe Komisariatin e Policisë Durrës.

Sipas burimeve zyrtare, Gjykata e Shkallës së Parë e Juridiksionit të Përgjithshëm në Durrës kishte caktuar ndaj të miturit masën e sigurisë “arrest me burg”, pas akuzës për plagosjen e shtetasit F. R. me mjet prerës.

Materialet për këtë ngjarje janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme ligjore.