Athinë, 6 korrik 2025 – Pas disa muajsh hetime të thelluara, autoritetet greke kanë arrestuar 12 persona, në lidhje me një konflikt të armatosur që ndodhi në shtator të vitit të kaluar jashtë një klubi nate në qytetin portual të Pireut. Të ndaluarit janë shtetas shqiptarë dhe grekë, të përfshirë në grupe kriminale rivale.

Ngjarja ndodhi në orët e para të mëngjesit të 29 shtatorit 2024, ku dy grupe të përbëra nga të paktën 6 persona secila fillimisht u përleshën fizikisht jashtë lokalit, përpara se të përdornin edhe armë zjarri, duke rrezikuar rëndë sigurinë publike në zonë.

Pas hetimeve të kryera nga autoritetet greke, u ushtruan kontrolle në banesat dhe mjetet e të dyshuarve, ku u sekuestruan:

3 armë zjarri: 2 pistoleta dhe 1 revolver

1 armë gjahu

2 karikatorë dhe një këllëf pistolete

Sasi fishekësh të kalibrave të ndryshëm

14 thika të ndryshme

Veshje të përdorura gjatë përplasjes

3 automjete dhe 1 motor

Tableta anabolike

2.4 gram marijuanë

175,470 euro cash

Gjithashtu, u sekuestruan doreza dhe objekte të tjera që dyshohet se janë përdorur gjatë incidentit.

Të arrestuarit përballen me një sërë akuzash të rënda, përfshirë:

Krijim të një organizate kriminale

Tentativë vrasjeje me dashje

Dëmtim të rrezikshëm trupor

Shkelje të ligjeve për armët dhe lëndët narkotike

Shkelje të detyrës

Sipas policisë greke, shumica e personave të ndaluar kanë të kaluar kriminale për vepra të mëparshme të ngjashme, ndërsa hetimet po vijojnë për të zbardhur tërësisht rrjetin kriminal dhe fushëveprimin e tij në zonën e Atikës dhe më gjerë.