Një përpjekje e rrezikshme për kalim të Kanalit të La Manshit u ndërpre në mënyrë dramatike nga forcat franceze të sigurisë, të cilat çanë me thikë një gomone me dhjetëra emigrantë, pak para se ajo të nisej drejt brigjeve britanike.

Pamjet, të siguruara nga BBC, tregojnë momentin kur rreth 80 deri në 100 persona, përfshirë gra dhe fëmijë, përpiqen të hipin në një gomone në një plazh pranë qytetit Boulogne-sur-Mer. Disa emigrantë ishin pajisur me jelekë shpëtimi, ndërsa të tjerë vraponin nga dunat e rërës drejt bregut për të zënë vend në mjetin lundrues të organizuar nga trafikantët.

Në një situatë gjithnjë e më të tensionuar, një gomone tjetër ishte nisur më parë pa mundësi kthimi, ndërsa grupi i mbetur përpiqej të nisej me mjetin e dytë. Pjesëtarë të policisë franceze fillimisht qëndruan në distancë, duke respektuar protokollet që ndalojnë ndërhyrjen në det përveç rasteve të rrezikut të drejtpërdrejtë për jetën.

Sipas dëshmitarëve, gomonia filloi të lëkundej fuqishëm dhe pësoi defekt në motor, duke e bërë situatën kritike. Në atë moment, një nga oficerët dha urdhër për ndërhyrje të menjëhershme. Policia hoqi pajisjet mbrojtëse dhe u fut në ujë, ku çau gomonen me thikë, ndërsa trafikantët përpiqeshin të riaktivizonin motorin.

Të gjithë personat u nxorën në breg në gjendje të sigurt, pa lëndime, ndërsa gomonia u tërhoq më pas nga autoritetet. Emigrantët u panë më vonë duke u larguar nga zona me sende personale, ndërsa u orientuan drejt strukturave pritëse më në veri të vendit.

Zyrtarët francezë deklaruan se protokollet e sigurisë mbeten të pandryshuara, pavarësisht kërkesave të vazhdueshme nga Londra për masa më të rrepta në kufijtë bregdetarë. Nga ana tjetër, një zëdhënës i Kryeministrit britanik e përshkroi ndërhyrjen si “një veprim vendimtar që shpëtoi jetë” dhe e vlerësoi bashkëpunimin e autoriteteve franceze në parandalimin e migrimit të paligjshëm.