Durrës, 3 korrik 2025 – Një ngjarje e rëndë është regjistruar në lagjen nr. 13 të Durrësit, ku katër persona i morën një qytetari shumën prej 1.5 milionë lekësh nën kërcënimin e armës. Policia ka arrestuar një nga autorët, ndërsa tre të tjerët janë shpallur në kërkim.

I arrestuari është shtetasi A. L., 40 vjeç, banues në Durrës. Ai u kap pas hetimeve intensive nga Specialistët për Hetimin e Krimeve të Komisariatit të Policisë Durrës, në bashkëpunim me Seksionin për Hetimin e Krimeve ndaj Personit në DVP Durrës. Sipas denoncimit të bërë nga viktima, shtetasi A. I., ngjarja ndodhi një ditë më parë, kur katër persona e kanosën me armë dhe i morën shumën në fjalë.

Policia ka identifikuar edhe tre bashkëpunëtorët e tjerë të dyshuar, të cilët aktualisht janë në kërkim: R. I., 40 vjeç, L. I., 20 vjeç dhe E. M., 34 vjeç, të gjithë banues në Durrës. Forcat e rendit janë në ndjekje të tyre dhe vijon puna për kapjen dhe ndalimin e këtyre shtetasve.

Ngjarja është në hetim të mëtejshëm dhe pritet të zbardhen plotësisht motivet dhe rrethanat e saj.