Cërrik, 2 Korrik 2025 – Gjatë një takimi të zhvilluar sot në qytetin e Cërrikut me fokus në zhvillimin bujqësor, Kryeministri Edi Rama ka shprehur shqetësimin për largimin e pushtetit vendor nga problematikat reale të fshatit dhe sektorit rural.

Në fjalën e tij, Rama kritikoi drejtuesit vendorë të bashkive të qarkut Elbasan, duke theksuar se “kryebashkiakët janë shkëputur nga fshati” dhe nuk e konsiderojnë zhvillimin rural si pjesë të përgjegjësive të tyre institucionale.

“Pas reformës administrative-territoriale, fshati është lënë pas dore. Interesimi është reduktuar vetëm në rrugë, ndriçim dhe kanalizime, ndërkohë që mungon mbështetja për zhvillimin e sipërmarrjeve bujqësore,” – u shpreh Kryeministri.

Ai nënvizoi se në shumë zona rurale mungojnë modelet funksionale të bashkëpunimit ndërmjet fermerëve, bizneseve dhe bashkive, duke e konsideruar këtë një pengesë serioze për zhvillimin ekonomik lokal.

Rama bëri të ditur gjithashtu se është siguruar një linjë e re kredie prej 250 milionë eurosh, në bashkëpunim me Bankën e Shqipërisë, e cila synon të mbështesë projektet bujqësore dhe zhvillimin rural në shkallë vendi.

Megjithatë, ai paralajmëroi se nëse nuk ndryshon qasja e pushtetit vendor, fondet e reja rrezikojnë të mos kenë efektin e dëshiruar.

“Këto financime nuk do të sjellin zhvillim të qëndrueshëm nëse mungon vullneti dhe vizioni i drejtuesve vendorë për ta vënë bujqësinë në qendër të prioriteteve të tyre,” – theksoi Rama.

Në përfundim, Kryeministri u bëri thirrje kryebashkiakëve që të tregojnë më shumë përkushtim ndaj fshatit dhe fermerëve, duke vendosur në themel të punës së tyre zhvillimin rural të qëndrueshëm dhe forcimin e bashkëpunimit lokal.