Torino, 28 qershor 2025 – Torino FC ka finalizuar afrimin e mbrojtësit të Kombëtares shqiptare, Ardjan Ismajli, duke e bërë pjesë të skuadrës për sezonin e ardhshëm. Sipas raportimeve të besueshme nga Gianluca Di Marzio, Ismajli i është bashkuar klubit si transferim i lirë nga Empoli.

Ky është një veprim strategjik i klubit piemontez, që pas zyrtarizimit të Marco Baronit si trajner i ri, po ndërton një formacion të ri për sezonin 2025/26. Në këtë kuadër, Torino po përgatitet për largimet e disa titullarëve, përfshirë Saul Coco, që është lidhur me një transferim të mundshëm në Arabinë Saudite (ndonëse lojtari ka refuzuar ofertën), dhe Samuele Ricci, i cili pritet t’i bashkohet Milanit.

Për të siguruar kontinuitet dhe mbulim cilësor në repartet kyçe, Torino ka goditur në merkato me dy përforcime nga Empoli: Ardjan Ismajli, që vjen si transfer i lirë, dhe mesfushori anglez Tino Anjorin, për të cilin është paguar një shumë prej 5 milionë eurosh.

Për Ismajlin, 28-vjeçarin që luan në Itali që nga viti 2020, ka pasur interesim të madh gjatë merkatos. Klube si Bologna dhe Verona në Serie A, si dhe Beshiktash në Superligën turke, kanë shprehur dëshirën për ta afruar, por në fund ishte Torino që siguroi shërbimet e tij.

Në sezonin e fundit me Empolin, Ismajli ka qenë një nga mbrojtësit më të qëndrueshëm, duke konfirmuar progresin e tij të vazhdueshëm në futbollin italian. Me këtë transferim, ai pritet të ketë një rol të rëndësishëm në skemat e trajnerit Baroni.

Për Kombëtaren shqiptare, ky është një tjetër zhvillim pozitiv, pasi një nga mbrojtësit kryesorë të saj do të vazhdojë të luajë në një nga ligat më të forta të Europës.