Tiranë, 28 Qershor 2025 – Ish-këshilltari për sigurinë kombëtare i ish-presidentit amerikan Donald Trump, John Bolton, ka deklaruar se vendimi për shpalljen “non grata” të ish-kryeministrit shqiptar Sali Berisha nga Departamenti Amerikan i Shtetit (DASH) nuk ka qenë i duhuri dhe duhet të rishihet.

Në një intervistë për emisionin “Off the Record”, Bolton tha se ky vendim ka qenë i ndikuar politikisht, duke shtuar se është i nevojshëm një rishikim i plotë i tij.

“Këto vendime kanë qenë subjekte të ndikimeve politike. Unë mendoj që duhet rishikuar. Nuk e di deri në çfarë mase duhet të shkojë, por mendoj se nuk ishte vendimi i duhur dhe duhet të rishihet,” u shpreh Bolton.

Ai shtoi se situata kërkon zgjidhje të shpejtë dhe se marrëdhëniet duhet të rikthehen në normalitet.

“Shpresoj të mund të kthehesha pas dhe ta ribëja, por kjo është e pamundur. Megjithatë, shpresoj që të gjendet një zgjidhje e shpejtë dhe të kemi një sjellje më normale në këtë drejtim,” theksoi ai.

Deklaratat e Bolton vijnë në një kohë kur diskutimi për vendimin “non grata” ndaj Berishës mbetet një nga çështjet më të nxehta në politikën shqiptare dhe marrëdhëniet SHBA-Shqipëri.