Vau i Dejës, 27 qershor 2025 – Policia shqiptare ka arrestuar 23-vjeçarin Ergys Arrnjeti, i shpallur në kërkim ndërkombëtar nga autoritetet italiane për trafikim të lëndëve narkotike, kryer në kuadër të një organizate kriminale.

Operacioni u zhvillua në fshatin Barbullush të Vaut të Dejës, si pjesë e aksionit të koduar “Operacionalja 49”, të organizuar nga Drejtoria e Forcës së Posaçme Operacionale në bashkëpunim me rrjetin ENFAST dhe autoritetet italiane.

Sipas Policisë së Shtetit, Gjykata e L’Aquilas në Itali kishte vendosur ndaj tij masën e sigurisë “arrest në burg”, për një vepër penale që sipas Kodit Penal italian mund të dënohet deri në 24 vite heqje lirie.

Procedurat për ekstradimin e Ergys Arrnjetit drejt Italisë janë në vijim, si pjesë e përpjekjeve për vënien para drejtësisë të shtetasve të përfshirë në veprimtari të paligjshme ndërkombëtare.