Venecia, 26 qershor 2025 – Themeluesi i Amazon, Jeff Bezos, dhe partnerja e tij Lauren Sanchez po përgatiten për një nga eventet më të bujshme të vitit, të cilësuar nga mediat si “dasma e shekullit”. Ceremonia luksoze pritet të zhvillohet në zemër të lagunës veneciane, ndërsa detajet e saj po tërheqin vëmendjen botërore, si për madhështinë, ashtu edhe për polemikat që ka shkaktuar.

Çifti mbërriti në qytetin italian me megajahtin "Koru", një mjet lundrues 127 metra i gjatë, me vlerë rreth 500 milionë dollarë, që simbolizon pasurinë marramendëse të Bezos – një nga njerëzit më të pasur në botë.

Shifra dhe kritikaCeremonia do të ketë rreth 200 të ftuar, shumë prej të cilëve personalitete të njohur nga bota e biznesit, politikës dhe artit. Vlera totale e dasmës llogaritet të jetë mes 10 dhe 20 milionë dollarë, me një kosto mesatare prej 50,000 dollarësh për çdo të ftuar.

Këto shifra kanë shkaktuar kritika të forta në rrjetet sociale, ku shumë përdorues kanë vënë në dyshim vendimet e Bezos: “Nëse mund të shpenzojë kaq shumë për një dasmë, pse nuk kontribuon më shumë në pagesat e taksave për Amazon?” është një ndër komentet më të përhapura.

Detaje të rezervuara dhe siguri e lartëData e saktë dhe vendi i kurorëzimit mbahen konfidenciale, por sipas burimeve, festa madhore do të zhvillohet të shtunën në “Arsenale”, një strukturë historike e rrethuar nga mure të larta, dikur zemra e ndërtimit detar të Republikës së Venedikut në shekullin XV.

Pesë nga hotelet më luksoze të qytetit janë rezervuar tërësisht për të pritur të ftuarit, përfshirë figura të rëndësishme si Ivanka Trump dhe Jared Kushner, të cilët kanë mbërritur në Venecia pas pushimeve në Toskana.

Një pjesë e ftesës së dasmës, e cila është publikuar në rrjete sociale, ka nxitur komente tallëse për “mungesë stili dhe profesionalizmi në dizajn”, ndërkohë që vetë çifti nuk ka dhënë ende asnjë koment publik mbi eventin.

Ndërsa Venecia përgatitet të presë një nga ngjarjet më të ndjekura të vitit, sytë e botës janë drejtuar nga çdo lëvizje e çiftit Bezos-Sanchez – për një dasmë që po shkruan historinë e luksit, por edhe të debatit publik.