Vlorë, 26 qershor 2025 – Vajza e presidentit amerikan Donald Trump, Ivanka Trump, dhe bashkëshorti i saj Jared Kushner, kanë zhvilluar një vizitë private në qytetin bregdetar të Vlorës, e shoqëruar nga masa të jashtëzakonshme sigurie për shkak të tensioneve globale dhe profilit të lartë të çiftit.

Burime mediatike ndërkombëtare raportojnë se vizita e çiftit përfshiu një ekspeditë në ishullin e Sazanit, ku pritet të ndërtohet një resort luksoz me investime të drejtpërdrejta nga Kushner. Projekti në fjalë parashikon ndërtimin e një marine turistike, rezidencash elitare, një zone gastronomike dhe njësi akomodimi premium në një sipërfaqe prej 45 hektarësh, me një vlerë investimi që kap shifrën e 1.4 miliardë eurove.

Më herët, në dhjetor 2024, qeveria shqiptare e nxori ishullin e Sazanit nga përdorimi ushtarak, duke hapur rrugën për zhvillime strategjike turistike.

200 agjentë për sigurinë Për shkak të origjinës hebreje të Kushner dhe situatës së tensionuar mes SHBA-së, Iranit dhe Izraelit, siguria për çiftin ishte në nivelin maksimal. Mbi 200 agjentë të shërbimeve amerikane u dislokuan në Vlorë për të garantuar lëvizjet e tyre.

Ivanka dhe Jared u panë duke shëtitur në shëtitoren Lungomare, ku u fotografuan në një atmosferë të qetë, ndërsa më pas drekuan në restorantin “Gjurma”, ku u pritën nga shefi i kuzhinës Aldo Mehmeti.

Vizita e tyre po interpretohet si një sinjal i fortë për angazhimin e drejtpërdrejtë në projektin ambicioz në ishullin e Sazanit, i cili pritet të transformojë zonën në një qendër të turizmit elitar në Mesdhe.