Tiranë, 25 qershor 2025 – Policia e Tiranës ka arrestuar një 33-vjeçar të shpallur në kërkim për shpërndarje droge në ambientet e natës, si pjesë e megaoperacionit antidrogë të koduar “Blloku 33”.

Shtetasi A.B., 33 vjeç, u lokalizua dhe u kap në zonën e Kasharit nga shërbimet e Seksionit për Hetimin e Narkotikëve, në bashkëpunim me Komisariatin Nr. 6, pasi u siguruan informacione operative mbi vendndodhjen e tij. Ai akuzohet për veprën penale “Prodhimi dhe shitja e narkotikëve” dhe ndaj tij është caktuar masa e sigurisë “Arrest në burg”.

Me arrestimin e këtij shtetasi, shkon në 27 numri i personave të vënë në pranga në kuadër të operacionit “Blloku 33”, që ka në shënjestër rrjetet e shpërndarjes së drogës në kryeqytet, veçanërisht në lokale nate.

Policia njofton se vijojnë kërkimet për kapjen e edhe 6 shtetasve të tjerë të shpallur në kërkim. Materialet procedurale për këtë rast i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.