SHBA, 24 qershor 2025 – Pas disa ditësh pasigurie dhe negociatash intensive, Neymar dhe klubi brazilian Santos kanë arritur një marrëveshje për rinovimin e kontratës, e cila do të zgjasë deri në dhjetor 2025. Lajmi është konfirmuar nga disa media braziliane, ndërsa zyrtarizimi pritet të bëhet publik në ditët në vijim.

Santos, që aktualisht po lufton për mbijetesë në Serinë A, ka arritur të bindë yllin brazilian të qëndrojë dhe të ndihmojë skuadrën në këtë periudhë të vështirë. Megjithëse klubi kishte shpresuar në një kontratë deri në qershor 2026, marrëveshja aktuale përfshin një klauzolë që lejon zgjatjen automatike me gjashtë muaj të tjerë, nëse Neymar arrin objektiva të caktuar në minutat e luajtura dhe rezultatet sportive.

Rikthimi i Neymar-it te Santos nuk ka qenë pa pengesa. Ai ka arritur të luajë vetëm 12 ndeshje, duke shënuar 3 gola dhe dhënë 3 asistime. Në kampionatin brazilian ka regjistruar vetëm 181 minuta, për shkak të dy dëmtimeve në kofshën e majtë dhe një episodi me COVID-19, që e kanë mbajtur jashtë fushave për 10 ndeshje.

Në një moment vendimtar për klubin, prania e Neymar-it shihet si thelbësore për ringritjen e Santos-it. Nga ana tjetër, vetë lojtari e konsideron këtë si një mundësi për të rikuperuar formën dhe për të bindur trajnerin Carlo Ancelotti që ta përfshijë në listën e Brazilit për Kupën e Botës 2026.

Në këtë fazë, Santos dhe Neymar kanë nevojë për njëri-tjetrin: klubi për të shpëtuar sezonin dhe lojtari për të shpëtuar karrierën.