Teksa aleatët bëjnë thirrje për diplomaci, Trump ngre mundësinë e ndryshimit të regjimit në Iran

Presidenti Trump sugjeroi se një qeveri e re mund të marrë pushtetin në Teheran, pasi ndihmësit e tij kryesorë thanë se SHBA nuk dëshiron një luftë të gjithanshme. Irani u zotua të mbrohet pas një sulmi që, sipas zyrtarëve të Pentagonit, ka dëmtuar rëndë objektet bërthamore të Teheranit.

Ndërsa udhëheqësit botërorë bënë thirrje urgjente për diplomaci, Presidenti Trump të dielën ngjalli mundësinë e një ndryshimi regjimi në Teheran, më pak se 24 orë pas sulmeve ajrore të SHBA-së ndaj tre objekteve bërthamore iraniane, që nxitën frikën për një përshkallëzim të rrezikshëm të konfliktit në Lindjen e Mesme.

“Nëse regjimi aktual iranian nuk është në gjendje ta BËJË IRANIN SËRISH TË MADH, përse të mos ketë një ndërrim regjimi???” shkroi z. Trump në një postim në rrjetin e tij social. Ky postim erdhi pasi zyrtarët më të lartë të administratës së tij kaluan pjesën më të madhe të ditës duke theksuar se Shtetet e Bashkuara nuk synojnë të hyjnë në një luftë të plotë me Teheranin.

Trump sugjeroi se mund ta imagjinonte Iranin duke refuzuar udhëheqjen aktuale të qeverisë së tij, pasi zyrtarët e administratës së tij kishin theksuar se Shtëpia e Bardhë nuk po kërkonte një ndryshim regjimi.

“Nuk është politikisht korrekt të përdoret termi ‘Ndryshim Regjimi’, por nëse regjimi aktual iranian nuk është në gjendje ta BËJË IRANIN SËRISH TË MADH, përse të mos ketë një ndryshim regjimi???” shkroi Trump në rrjetin e tij social. “MIGA!!!” (Make Iran Great Again – Bëje Iranin Sërish të Madh).

Kjo deklaratë përbënte një lloj tërheqjeje nga qëndrimi i Sekretarit të Mbrojtjes, Pete Hegseth, i cili gjatë një konference për shtyp të dielën në mëngjes deklaroi se ndryshimi i regjimit nuk ishte pjesë e misionit të bombardimeve ajrore ndaj tre objekteve bërthamore iraniane.

***

Objektet bërthamore iraniane — në Fordo, Natanz dhe Isfahan — pësuan atë që zyrtarët e Pentagonit e përshkruan si “dëme të rënda” nga sulmet e SHBA-së. Zyrtarët iranianë dënuan Shtetet e Bashkuara, dhe ministri i jashtëm i vendit, Abbas Araghchi, tha në një konferencë për shtyp në Stamboll se Irani “i rezervon vetes të gjitha opsionet për të mbrojtur interesat e tij të sigurisë dhe popullin”. Ai nuk pranoi të jepte më shumë detaje, përfshirë nëse Irani do të hakmerret ndaj forcave ushtarake amerikane në Lindjen e Mesme, ku më shumë se 40,000 trupa amerikane janë të vendosura në baza dhe anije luftarake. /noa.al